ಸಾಕಾಗಿದೆ ಗೆಳತಿ

ನಮ್ಮ ಮಾತುಗಳು ಬೆರೆತುಹೋದರೆ

ಮೂಡಿರುವ ಕುತೂಹಲ ಕಡಿಮೆಯಾಗಬಹುದು

ಮೌನದ ಮಜಾ ಮರೆಯಾಗಬಹುದು

ಅವಿತಿರುವ ಭಾವನೆಗಳಿಗೆ ಅರ್ಥ ಬಂದುಬಿಡಬಹುದು

ಆದರೆ,

ಈ ಮೌನ ಸಂಭಾಷಣೆ ಸಾಕಾಗಿದೆ ಗೆಳತಿ

 

ಪರಸ್ಪರ ಪ್ರೀತಿಸುವ ಹೃದಯಗಳು

ಭಾರವಾಗಬಹುದು

ಮರಿ ಹಕ್ಕಿಗೆ ಬಲಿತ ಪುಕ್ಕ ಕೊಟ್ಟ

ಖುಷಿಯ ಅನುಭವವಾಗಬಹುದು

ಕಾಯುವಿಕೆಯಲ್ಲಿರುವ ಸುಖ

ಕಡಿಮೆಯಾಗಬಹುದು

ಆದರೆ,

ಈ ಮೂಕ ಸಂವೇದನೆ ಸಾಕಾಗಿದೆ ಗೆಳತಿ

ಹೊಸ ಸವಾಲುಗಳು

ಸಿಡಿಲಿನಂತೆ ಎರಗಬಹುದು

ಆಪ್ತರ ಆಪದ್ಭಾಂದವರ

ಆಸರೆ ಸಿಗದೇ ಹೋಗಬಹುದು

ಜೊತೆ ಬೆರೆತು ಆನಂದಿಸುವ

ಸ್ವರ್ಗದ ಅನುಭವ ಸುಸ್ತಾಗಿಸಿಬಿಡಬಹುದು

ಆದರೆ,

ಸಹಿಸಲಾಗದ ವೇದನೆ ಸಾಕಾಗಿದೆ ಗೆಳತಿ